Amigos de Serrablo

EN O INVIERNO
En o preto invierno namas quedaban en o lugar os agüelos, as mullers y os zagals. L'amo teneba qu'estar con o ganau en Tierra Baxa, si no iba podíu afirmar bel pastor. Os tions chobens s' en iban enta Francia pa trebajar de peons en bella fabrica, en bella granja u en bella obra, pa ganasen unas perras, que güena honra les feban pa pasar l'año.

O día ye mu corto yo trebajo cambea según aiga nieve u no. Mientras no cayeba bella nebadota, l' agüelo u bel mozé soltaba as vacas ent'os zerraus d'o solano y de noches se recojeban ent'as cuadras. Tamién se soltaban os casalizos pa que comesen en o güeno o día.

En que cayeba bella nevada, abeba que dales de comer as vacas, que pasaban dos u tres meses a pesebre. As cuadras teneban .unas trampas denzima d'os rastillos, pa ichales a yerba dende o pajar. Si o pajar estaba separau, se trayeba a yerba en os ruscaderos, cargaus en as costillas. Namas se sacaban, tos os días, p'abrebalas en o cuma d'a fuente.

Os casalizos s' encerraban en as buerdas d'o solano, anque nevase, saliban a comer bella miaja por debaxo d'os caxicos, u se les ichaba unas ramas de caxico, recojiu en a sanmigalada, p'aduyales a pasar o invierno.

Amás, abeba que mantener os machos, os tocinos, as gallinas y os conejos. Asina que faina no faltaba p'os pobres agüelos, as mullers, as mozetas y os mozés. Os zagals teneban qu'ir enta escuela.
- A lo mejor t'ichabas con o suleo limpio y, de mañanas, amenezebas con un palmo de nieve.
- Seguiba nevando y nevando to'l día, y se tapaban as allagas, os buxos y as parés, namas se biyeban os arbols...
- Pa ir ent'as cuadras u a abrevar os abríos, abeba que abrir camino con as palas.
- Os turbios arrastraban a nieve y se feba cuniestras por as calles y as puertas. Por os pacos y as sierras no s'en iba en to'l invierno..., -charraba o tión, Babil.

O CASALIZERO
Os casalizos yeran as reses que no baxaban enta Tierra Baxa: as crabas, as borregas y bel borrego. O que las cudiaba se llamaba o casalizero, que yera l'agüelo, bel tión biello u bella mozeta.

Pasaban o invierno por os zerraus de debaxo d'o lugar, ande nevaba menos y s'en iba antes. Comeban o justo pa salvar a pelleta: como no criaban, con bella miajeta teneban prou... Rebuscaban a yerba seca por a lau d'as allagas, d'os buxos, d'os caxicos y bel brote tierno que trababan en o caxicar.

Anque cayese bella nebadota, den seguida se feba terreño por debaxo d' os arbols y d' as matas. Y, os días piores, se les ichaba una miajeta d'hoja en a buerda, pa que no se morisen de fambre.

Como feba fria y, a ormino, plebeba u nevaba, o casalizero se pasaba cuasi tal día fiendo fuego en a caseta, con o perro preto en os pies. Namas saliba enta portera pa biyer si se sentiban os esquillons por o zerrau u iban brincau ent' o de otri. Si yera mozé u mozeta, s'ajuntaban bel rato a charrutiar con os d'otras casas. Si s'escudiaban, tamién as reses feban o mesmo y dimpués teneban qu'sbarralas.

Si o casalizero yera l' agüelo u bel tión, no paraba gota. Charticaban as allagas, os artos y os buxos, pa que abese más yerba y no s'ejasen a lana con os roces. Feban y reparaban as barzadas y paretons alredor d'os zerraus, pa que no s' en isen as reses enta fuera. Y tamién s' entreteneban fiendo leña. Aún les sobraba bel rato pa poner letreros, con bel martillo, en as piedras d'a caseta u en os maderos, con bel troz de lapicero, iziendo cosas asina:
- "28 de diciembre de 1938, estoi pastor en as Eretas, ai un palmo de nieve y no para de nevar. Babil".
- "Plebe y no par de pleber, 3 de marzo de 1940. Antón".

Un piazo de pan, una chulla y bella magra, un poqué de vino en a bota, pa pasar to'l día. O justo pa matar a fambre, como o ganau que cudiaban...

FER TIEDA
As tiedas ardeban en o tedero, p'alumbrar en o fogar en as largas beiladas d'o invierno. ¡Cuántas s'en habrá quemau debaxo d'as chamineras de Sobrepuerto! Se sacaban d'as tozas biellas de pino, que s'iban cortau años atrás.
- Mañana tendrez que baxar alguno a soltar os casalizos, yo m'en iré con un macho a uscar tieda, ent'o Fulco Estrecho, -izía l'agüelo en a cadiera.
Cojeba in jadón pa picar alredor d'a toza y, con una estral, le cortaba as raices. Dimpués l'en cargaba a o macho, aparejau con o baste y os picos.

Otro día la rajaba con as falcas y o mazuelo, en a puerta de casa u en o patio. Con a estraleta feba as estillas.
- Atiza a tieda, mozé, que se va a apagar y se m'en saldrán os puntos d'a media, -charraba l'agüela una noche.

AS HOJAS D'O CAXICOS
- Aura que s'a joriau o tempero, ibaz d'ir a replegar as hojas d'os caxicos, ent'as Eretas, que güena honra fa pa limpiales a cama a os abríos...

En que a mayor parte d'as hojas s'iban caiu ent'o suelo, s'escobaban enta un montón. Dimpués se carriaban a cargas enta un cubierto.

En o preto invierno se les meteban de cama as vacas, os machos y os tocinos, pa que nos'emporcasen tanto.

- Amás feban más fiemo, que yera mu güeno pa femar os campos y fenales.

FER PINARRA
Si o invierno se feba mu largo y a yerba bultiaba poco en os yerberos, se cortaban as ramas bajeras d'os pinos chobens, pa dalesne as crabas en o rastillo. Cuando teneban fambre se lo comeban to.

L'agüelo Mariano siempre trayeba a colación cuentos d'otros tiempos:
- Ixe año se nos acabó a yerba y tubenos que fer pinarra en O Pinarón. La carriemos a l'hombro, porque os abríos no podeban salir de casa, de tanta nieve que abeba...

A LANA Y A CALZETA
As güellas s'esquiraban en sobir d'a Tierra Baxa. A mayor parte d'a lana se bendeba, quedándose a precisa pa casa.

As mullers la lavaban bien en o barranco Labañera u en o barranco d'os güertos. Se carriaba con bel burro y se tendeba a secar a lau de casa, por os artos u en bel fenal, asina se quedaba más blanca. Dimpués se guardaba en capazos, tapada con bella tela, pa que no le caese polvo.

En as largas beiladas d'a sanmigalada y más en o invierno, as mullers se poneban a treballar con a lana. Primero a escarminala con as manos, pa desenredala y aflojala. Otra la cardada, con as cardas, pa dejala fina y fer os copos. Dimpués a filala, con a rueca y o fuso.

A dueña d'a casa competiba con a choben pa biyer cuala filaba más fino.
- Mia que fas muchos borrons y dimpués no se podrán desimular.
- Pos yo no los beigo por nengún, lau...

A choben que sabeba filar fino y fer calzeta, teneba to de cara pa congraziase con a dueña. Toas as noches a güeltas con as aujas de fer media. Tamién tejeban cudiando bel rezago u as vacas.

Feban muchas cosas: jersís, calcetines, pedaletas, refajos, fajas, chalecos..., pa toas as chens d'a casa. As mullers charraban en o carasol:
- Nusotras no sabemos estar nunca mano sobre mano...

En o tocante a lana, os hombres namas feban esquirar as güellas, fer as ruecas, os fusos y os palicos p'apoyar as aujas en a zentura, u repasar a debanadera u o demoré.

Pero as mullers s' entreteneban horas y horas fiendo calzeta u media, a lau d'o fuego, en o balcón u en bel carasol con as vecinas.

A DAR GÜELTA POR O GANAU
O ganau de casa Camarrón y o de casa Sampietro, ixe año, pasaba o invierno en a Bal d'Osera. Como pastors se quedóh: Antonio, como repatán y Salvador, p'aduyale. No yera güeno quedase un pastor solo, y menos en o tiempo de parizón, pues as paridas abeba que llebalas aparte.

O pastor teneba que bejilar pa no perder nengún cordero. Pa traelos enta paridera teneba o burro, aparejau con a manta crabitera, con unas bolsas en os laus pa poner os corderés.

Os pastors pasaban o invierno en a caseta d' a paridera, anque se uscaban una casa en o lugar, pa que les lavasen a muda u pa estar si poneban malos.

Se bajaban patatas, tocino, carne salada, etc. Si escasiaban de algo, se lo compraban en o lugar (pan, vino...). Se feban a comida, p'almorzar y cenar, en a caldereta. O almuerzo consistiba, a mayor parte d'os días, en patatas con sopas u migas, bel piazo de tocino y güenos tragos de vino. Pa cenar, cuasi o mesmo. Pa pasar o día, una miajeta de brienda en o morral: un trozo de pan, bella magra u bel troz de tocino y una bota de vino.

O tión Babil iba pasau muchos inviernos en Tierra Baxa, esti año se quedó de casalizero y s' acordaba, sentau en a cadiera, d'as cosas que l'iban pasau:
- Acostumbraus a fer fuego con os tizons y güenas rallas, astí namas tenebas que ramotas de romero u de ontina, ni aun allagas... Te biyebas negro pa calentar a caldereta.
- O pior yera cuando se poneba a niebla. No se biyeba cosa por aquellas lomas. Abeba años que la tenebas cuasi to invierno. Tenebas que seguir detrás d'as güellas paridas, que golbeban de tardes enta paridera, por o fato d'os corderés.
- Un año cayó una nevada mu gran. No tenébanos cosa pa dales de comer y cuasi se moriban de fambre. Tubenos que marchar a comprar paja por os lugars d'alredor. Sin rastillos ni cosa, les ne ichábanos en o suelo.

Marino, l'amo choben, escuchaba fito a fito en l' otra cadiera y sacó a relucir o que pensaba fer:
- M'en debía de bajar a dar güelta por o ganau, pa biyer cómo va o parizón y si le preba bien a Salvador.. .
- Ah, pos tendrás que dezílene a Chuana de Sampietro, igual quie bella cosota pa Antonio, - terció l'agüela.
Asina lo fizo. S' estuvo dos u tres días con o mozé, Salvador, y l'otro pastor. Cuando golbió, as mullers le preguntón.
- ¿Qué fa Salvador?
- Ah, bien, paize. L'i dicho si quereba subisene enta casa pa quedame yo y m'a espachau...
- Amás, a aprendiu a trastiar a caldereta. - ¿Y as güellas?
- Va mu alantau o parizón.

Si a una güella se le moriba o cordero, se l'en acarrazaba otro de una que en abese teniu dos. Pa que se lo amase, se le poneba a piel d'o muerto por o lomo, atada con una cuerda. Si no lo queraba asina, se ataba en a pedera, enta una estaca d' a paré. En bella noche ya se lo amaba.

- Ixa güella ya la pues soltar d'a pedera, me paize que ya se l'amau...

A os pastors se les feba o tiempo mu largo, tan lejos de casa, siempre esperando o tiempo de sobir y mirando enta montaña.. .Astí s'acordaban d'o que feban en o lugar, d'as fuentes y d'a yerba d'o monte. Si se meteban malos, teneban que escrebir pa que bajase alguno p'aduyales.

A MATACIA
Se mataba un par de tocinos, p'o gasto de l'año, cuasi siempre a fin de diciembre u primeros d'enero.

Unos días antes, as dueñas preparaban as especias, o arroz y as vajillas. L'a o poneba a remojo a bazía, afilaba os cochillos, trayeba os faxos d ramilla pa fer güen fuego y as tiedas p'alumbrar.

A bispra no se les ichaba pastura a os tocinos y se les poneba güena cama de palla pa que' estasen limpios.

Al punto la mañana, acudiba a dueña a espertalos y a mobelos por o corral, pa que cagasen y pichasen. Poneba un caldero gran de agua a calentar en o fuego. Dispués prezipiaba a gritar por a cocina:
- Amos, mia si mobez, que fa o día mu corto y no nos dará tiempo de cosa.

Denseguida acudiban os hombres d'otra casa p'aduyales. Se comeban un par de tajadetas de pan con vino y azúcar antes de prenzipiar. A dueña, con una capazeta de prienso en a mano, llamaba a os tocinos:
- Gulo, gulo...

Os tocinos no quereban salir d'a zolle, se barruntaban o que les esperaba. En o primer escudio en enganchaban uno por o culleo, con o gancho de fierro, y, entre tos os hombres, lo ichaban ta denzima d'a bazía. O tocino chilaba mu fuerte, se sentiba por to o lugar. O matachín le clababa o cochillo por o cuello, pa degollalo, mientras a dueña recojeba a sangre en una pozaleta, pa fer tortetas y morcillas.

Dimpués de muerto, se golbeba a bazía, poniendo o tocino denzima de dos trancas, pa ichale l' agua hirviendo y pelalo con os cochillos entre tos.

Os hombres ichaban un trago pa coger fuerzas. Denseguida lo colgaban enta un madero d'o techo, p'abrilo en canal y sacale as tripas. Mientras un hombre con bella muller feban ixo, os otros mataban o segundo tocino, que yera más deficil cojelo, porque estaba espantau, y no quereba salir d'a zolle, anque tenese fambre. A dueña biella s' encargaba de ordenar o trebajo:
- Felisa: saca o burro d'a cuadra y ponle as aguaderas, pa llevar as tripas ent' o barranco d'os güertos, pa labalas, que o de Labañera está seco.
- Ya m'aduyará Chuana. Tú, mientras, prepara a carne en bel tarrizo, pa fer o mondongo esta noche y fa a comida.

Os hombres desazeban a canal, pa sacar un par de pernils, dos espaldars, dos témpanos, dos costillars y un lomo de cada tocino. Con ixo se pasaban a tarde. As mullers feban os preparativos d'a carne, pa mondonguiar al otro'l día, pos asina se tomaban mejor as especias. L'agüela l'izia a choben:
- Si estaz con a regla, no toquez o mondongo, que dimpués se ranciarán os embotidos.. .

Unas mullers cojeban a capoladera pa fer as longanizas, os chorizos, os salchichons, os arbiellos y a dobanica. Otras preparaban arroz con sangre y berzas picadas pa fer as morcillas. Y as demás mezclaban a farina con sangre y especias, pa fer as tortetas, que, con as morcillas, se herbiban en o caldero.

Os hombres poneban os jamons y os espaldars en sal, en a saladera, y trayeban ramilla pa fergüenas cheras en o fuego.

Os días d'a matacía se feba mu güena comida en a caseroleta, pizcas de tocino asadas en a parrilla, güenas natillas y vino rancio.

Unos días dimpués se preparaba a conserva u adobo: se troziaba bel costillar, os lomos y bellas longanizas y lo feban freir en un caldero, con manteca. A continuación lo meteban en cazuelas y olletas, pa guardalo en a bodega.

Continuará