EN A PRIMAVERA.

A nieve sen va aspazio por os pacos y os pozinos. En a Sierra yay güenas cuniestras, pero en as solaneras no enqueda miaja.

- Mientras aiga nieve en o paco Basaran, no fará güen tiempo. Aquí a primavera no se bei mas que en o calendario, -izía l'agüela Felisa, que siempre teneba bel dicho en a boca.

O tiempo que feba yera o calendario que seguiban pa fer as cosas cuasi to'l año. Os trebajos se repetiban un año y otro: os mesmos aperos pa otros brazos. O sol, a luna y as estrelas, que saliban y s'escondeban; os aires y as boiras, que correban; os animals, que barruntaban... ¿Pa qué quereban mejor calendario?

Babil, entrau en años y flojacho de remos, no bajó ta Tiera Baxa con o ganau, pero teneba que cudiar os casalizos. Tos os días con o morral y o tapabocas en o güembro, enta buerda d'o caxicar, pa soltalos a comer, pues ya saliba bella miajeta de yerba a lau d'as allagas. Asma ya no teneba que dales cosa en o pesebre.

- Ayer les iché a ultima hoja de caxico, como güelba a nebusquiar tendrán que comesen os rastillos, -izía de noches en o fogar, mientras s'enjugaba as pedaletas.

EN OS CAMPOS Y FENALES.

Miguel carriaba fiemo t'os campos con as algaderas, pa sembrar os tardanios (ono, guixas, lentejas, abeza...). Lo ejaba en montons, tal como cayeba, pa ensanchalos con a forca de fierro al punto de labrar.

- En que remate con o fiemo, espedregaré os capiteros, pues as güellas tiran as peñas ent'abaxo...

Tamién teneba que chartiar os artos y as allagas por os cantos d'as faxas, y fer as parés que s'iban esboldregau, pa que no 5 'en baxe amiajeta d'a tierra ent'o camino, enta difuera. Asma mesmo, limpiar y esbozar os zequions alredor d'os campos.

- Arre, güesque, pasallá..., tordillo -se siente arrear os machos por as calles, os camins y os campos.

Asti carriando o fiemo, entallá con os aperos de labrar, denzima regolbiendo a tierra con o aladro.

- O que no se pudo sembrar en a sanmigalada, yai que enterralo aura que paize que a escampau...-charraba Miguel de Camarrón.

En que se sembraban os tardanios, se prenzipiaban a preparar os fenals, alredor d'olugar. Se charticaban os artos, as allagas, as barzas y os buxos d'os cantos y tamién s'espedregaban. Dimpués se femaban, pa que a yerba se fese guallarda y os pajars s'enronasen hasta o zernillón.

- Os escañacabras d'abril les cairán mu bien y mejor, os temporais de mayo, -gosaba izir José d'Unsens.

Dimpués se seguiba con os güertos: os de secano, alredor d'as casas, y os de regano, en a glera y o barranco S. Sebastián.

Os de secano estaban dentro d'o lugar, yeran chicotes, pero siempre teneban bella cosota pa fer a comida. Os hombres paize que los teneban por demás, pero as dueñas saliban de muchos apuros con bel güello de col, bella zebolleta u ensalada, pa fer a cena.

Se trebajaban con a jada y se femaban mu bien. Se soleba fer bel pozo, a lo menos pa regar a planta y tamién se limpiaban os aguatiellos pa que entrase l'agua d'os camins. Asti se plantaban coles, cebollas, tomates, ensaladas, patatas, ajos y bella planta mericinal. Ixos güertos rezebiban a besita d'as dueñas tos os días.

- Anda, Orosia, ves ent'o güerto y mia si repelas bella col, pa fer una miajeta de verdura, asina estiras as garras..., -izia l'agüela Felisa.

Os güertos de regano cayeban lejos d'o lugar, a lau d'a Glera y d'o barranco San Sebastián. Como yeran más grans, se labraban con os machos, dimpués de limpiar a maleza y d'ichales o fiemo.

Asti se podeba asegurar a cosecha, al podelos regar. Asma, se cojeban güenas patatas, bainetas, coles de grumo y d'as otras, caimo, tomates, calabazas, remolachas...

Se treballaba bien a tierra y se feban as zequias por o capitero d'a faxa. Pa sembrar as jodías, se feban as eras, rodiadas d'un ballo, con una entradeta pa l'agua. As otras cosas se plantaban en o canto d'os ballos.

- Siña Felisa...
- ¿Quién va?
- Yo, Ramón de Sampietro. ¿Está Miguel?
- No, no a llegau aún d'os güertos, -respondió dende a bentaneta.
- Pues cuando bienga dile que, dimpués de cenar, feremos conzello en as escaleretas d'a plaza.
- Ah, güeno, ya l'en diré.

Ixe conzello yera pa fer dos u tres vecinales pa limpiar as zequias y golber os tornaguas, si s'iban esboldregau con as barrancadas. Se feban as paradas con piedras y tascones, y se poneban canaleras de madera, cuando abeba bel zinglo.

En que crezeban as plantas abeba que regalas. Pa ixo se seguiba un turno, acordau dende siempre sin escribilo: namas podeba regar un vecino por día y tornagua. As primeras bainetas y tomates no se cojeban hasta o mes d'agosto, por mu güena primavera que fese.

En que se femaba bel campo, yera apropiau labralo pa engolber o fiemo (mantornar), pa que no se lo llevasen as tronadas, y tamién se labraban os rastojos (romper).

- Mañana, que no nos toca o ganau y no yay otra fama, igual m'en voy a labrar ta Coronialla, pa entreteneme, -izía Mariano, cenando alredor d'o fuego.
- Y usté, agüelo, sen baje con o burro ent'os güertos pa fer unos palos pa empalar as jodías. Amás que se de güelta por os planteros.

A SOBIDA D'A TIERRA BAXA.

- Orosia: ya me pues preparar brienda, que mañana m'en voy con o zagal y Ramón de Sampietro enta Tierra Baxa, pa sobir o ganau.
- Tamién podebas haber abisau antes, ibanos preparau as cosas pa masar..., -espetó a muller.
- Pos yo tiengo que marchar, ya tos arreglarez.

Se lebantón os tres güena mañana, por Amielle, Oliván y Lárrede, a coger o tren enta Samianigo. Ixe invierno teneban o ganau en a bal d'Osera. Yera a ultima semana de mayo, con o tiempo asegurau y a yerba crezedera.

En que llegón enta paridera, se puson a replegar as cosas d'os pastors y a poneles as carnaleras a os carneros y os cuartizos a os chotos. Ya feba días que as güellas barruntaban a marcha enta montaña, no podeban parar con o calor.

Al otro día, de mañanas, cargón o burro cabañero y comenzón a marchar con a cabaña por Alfajarín, Montañana y Peñaflor, pa rodialas en una paridera d'as afueras de San Mateo.

- De cara t'arriba van más aprisa, cuasi no s'amorran a comer, -izía Miguel, mientras cenaban a rancho a lau d'o fuego.

Cuando pasaban por os lugars, teneban qu'estar agudos pa que no se perdese bella res u bel corderé. O aguacil saliba a cobrales por pasar por o termino y los acompañaba ent'as afueras.

Os guardas bejilaban pa que nos'esbarrasen por os sembraus.

Otra noche feban en Almudevar, en unos corrales que abeba a lau d'o cementerio. Dende asti, en otra tirada, por Guesca y Nueno, ent'o molino d' Arguis u o Mesón Nuevo, ande s'ajuntaban dos u tres cabañas. Unos bejilaban o ganau, pa que no s'ajuntasen y os otros feban una miajeta de juerga con os mesoneros.

Seguiban por Lanave, Hostal de Ipiés, pasando a noche en Isún u Satué. O ultimo día sobiban por os mallos, Sta. Orosia, Cruz de Cortillas y Basarán, pa llegar de noches enta Escartin.

- Chuana, Chuana...
- ¿Qué quiés?, Felisa.
- Que ize Mariano que se sienten os cuartizos por San Blas...
- Pos sí que s'an dau prisa, aura mesmo baxo a esperalos.

Ixe día yera una fiesta en o lugar: os agüelos, as mullers y os mozés saliban a rezibilos enta Cruzeta, hasta os perros andaban regüeltos. En pocos días, tos os rabaños, golbian d'a Tierra Baxa.

De noches, encerrón o ganau en un cletau y fizon una güena lifara en casa Sampietro, con os amos y os pastors que teneban afirmaus, ande no paró o porrón con güen vino d'o Somontano, encubau l'año d'antes.

- Quitazos a sé, que ya sus l'abez ganau por a cabañera, izia l'agüelo de Sampietro.

Y tamién bella jotica, con o son d'astenazas y badiles:

Sobimos dende Osera,
andando a cabañera
soñando con a yerbera
que aura nos espera.

ESQUIRAR.

O primero que se feba yera esquirar as güellas, aduyándose con os vecinos, os amigos y bel forastero. Unos ataban, otros esquiraban con as tijeras, y as mullers recojeban as lanadas enta un montón. Y era un trebajo mu duro, que prebaba bien os riñons. No gosaban charrár mica, namas se sentiba o roido d'as tijeras.

- Güenos días, siñores esquiradors, os atadors y tamién os miradors, -charró a mozeta María, que les trayeba o lasdiez en una cesteta.
- Güenos días, mozeta, -respondión os d'a lau d'a puerta.

A dueña, Felisa, preparaba güena comida: una copa d'anis a punto día, o almuerzo, o lasdiez, a comida de mediodía, a brienda y a cena. Amás, o porrón y o botejo no paraban de dar güeltas por o cletau u o corral.

- Aura esbarraremos os corderos pa esbezalos y asina podremos muyir as gñellas, pa fer queso, -
izia Miguel en a cadiera.

Feban un rabaño con tos os corderos d'o lugar, pa cudialos según os que teneban. Se soltaban por o cobajo d'a Sierra, pa que s'engordasen y podelos vender a bel tratante. De noches, s'mallataban en una corraliza, rodiada de paré y barzada.

O QUESO.

Mientras, as güellas se soltaban por os bajantes y de noches se feban dormir en os campos, en bel cletau u rodiándolas. A punto día acudiban as mullers a muyir, tamién bel hombre. Pa ixo, se meteban as güellas en o mosal, zerrau de paré por tos os laus.

Os muidors se poneban en ringlera, sentaus en os burros y as ferradas: a güella muyida, l'ichaban enta difuera, asina hasta rematar. Os ordeñadors golbeban cantando ent'o lugar, cargaus con as ferradas, pozaletas y cántaros de leche.

- Sebastián, bes a uscar un faxo de ramas pa calentar o caldero, -izía Felisa, güena muidora en otros tiempos.

Ichaban a leche en o caldero, colgau d'o cremallo, pa entibiala una miajeta. Antes se feba desfer una miajeta de cuajo en una cazoleta, pa añadilo en a leche. Ixe cuajo saliba d'o estomago de un corderé u crabito de leche, que s'iba muerto u l'iban matau pa comelo.

Se regolbeba bien a leche con o cuajo y s'ejaba reposar pa que cuajase. A dueña cojeba o preto pa llenar os aros, denzima de una bazieta de mader, apretando bien con as manos, pa que os quesos salisen duros y en caramuello. Les ichaba sal por denzima y no los sacaba d'os aros hasta l'otro día.

O lequido sobrante, o siero, golbeban a calentalo una miajeta, que se bebeba fresca. Teneba poco alimento, pero yera mu apetitoso.


- Si no por a sericueta, o requesón y o preto, no'n habría chen viva en to ro Sobrepuerto, -
izían por a redolada.

Os quesos se meteban en a bodega, en una tabla, tapaus con un masero. Tamién 5 en poneba en aceite, en una olleta. Cuando iban a comprar bella cosota, ta Fiscal u ta Broto, les ne daban a cambio a os tenderos.

A nata d'a leche se recojeba tos os días pa fer a mantequilla. Abeba que batela aintro d'un puchero, hasta que se feba una bola y se meteba en unos moldes alargaus.

CUDIAR O GANAU.

Como abeba que fer tantos treballos, s'ajuntaban as güellas en dos rabaños, que se soltaban hasta o pie d'a Sierra.

De noches bajaban ent'os campos pa femalos.

- ¿T'ande vas Babil?
- M'en voy a aduyale o pastor, a rodiar ta San Pelay.
- Ya pues tapate bien a capeza, pa que no te caiga a serena.
- A yo no me fa mal ni a serena, ni as estrelas, ¡I dormiu tantas veces al raso!...

O pastor dormiba a lau d'as güellas, en o suelo, denzima d'as peñas y os torrocos u en bel marguinazo, tapau con as mantas de lana. Asma que, de mañanas, estaba esquinazau de dormir d'ixas trazas. Amás teneba que dormir con un güello abierto y otro zerrau, pues o ganau s'enpodeba ir d'a faxa:


- Si dormibas a pierna suelta, de mañanas, te trobabas sin ganau, s'en iban iu por o monte t'adelante, -paroliaba Grabiel de Blas, glien rodiador d'otros tiempos.
- Y si cayeba bella tronada, a metá noche, tenebas que correr con as mantas enta caseta, pa no mojate.

O pastor, tos os días, con o morral y a zamarra en o güembro. A zamarra p'abrigase os riñons, si mobeba bella zierzera, u pa ichase bella clucadeta mientras o ganau acaloraba. Tampoco ejaba nengún día o batiaguas gran:

- Si plebe, pa no mojame y, si fa sol, pa feme guambra, -charraba Tomás de casa Ezquerra.

Cada 50 güellas, se cudiaban un día, y se gosaba avisar d'unos ta otros:

- Ferré, mia que mañana te toca o ganau.
- Ah, gueno, en ixo estamos.

Si por o que fuese no se podeba, s'entendeban bel dias más y dimpués se le golbian as tornas.

Os guas se soltaban por os rastojos, dimpués por os Cubilás, que ye un troz d'a Sierra. O día 13 de junio -San Antonio- se soltaban ya por toa Sierra. To o verano seguiban asti, cudiándolas según as que se teneba.


- ¿Pa qué te bantas, tan pronto Sebastián?...
- Pa sobir con as vacas enta Sierra.
- Pos si ya va Martín, ¿pa qué quies ir tú?.
- Porque me fa goyo biyer a yerba que yai o primer día, y tamién tocar a nieve que yai en o cerro...
- Pos ya l'en pues izir a tu madre y cójete o jersé, que fa frío. Cuando yo yera mozeta tamién quereba sobir..., -respondeba l'agüela.

En que as vacas enfilaban o camino d'a Sierra, no paraban miaja a comer, toas quereban llegar as primeras ent'o zenzero. Y os vaqueros cuasi no podeban seguilas, con a lengua fuera. En que llegaban t'os Ballones, las ejaban estar y s'en sobian enta punta d'o cerro, pa tocar a nieve y mirasen ta valle Broto y t'os puertos de Francia.

As güellas tamién iban ganando altura: por as Fuebas, o Collé, o Cuello, a Ralla, Gasarto..., hasta que entraban en a Sierra, ya en o verano. A metá de junio, o lugar se quedaba sin animais, no se sentiban as esquillas en to o verano. Namas quedaba bella güellota modorra u coxa, que no podeba seguir o rabaño.