Pastorada de Santa Orosia 1998 | Amigos de Serrablo

CANTO:

¡CUANTO GOZO, QU'ALEGRIA
DE GOLBE-NOS ALCONTRAR
P'ASTI PODER ZILEBRAR
A FIESTA E SANTA OROSIA!
PA YO NO HAY DIYA MAS GRAN
QU'O BENTEZINCO DE CHUNIO,
A FIESTA D'A NUESTRA TIERRA,
YE O QUE M'ENSEÑO O MIO PADRE!

PRESENTAZIÓN

MAIRAL:

Nusotros semos pastors,
chens de poqueta escuela.
¡No tos is d'encarrañar,
si a nuestra traza e charrar
l'alcontráis bel siñal aspra;
qu'apaizida yera a fabla
d'os nuestros antepasaus,
a que por siglos charrón,
porto ist'Alto Aragón!
¡Charremos aura d'o mundo,
ye tantismo o que cambea,
qu’as chanada que tramena,
a contá-las vo n'adubo!
¡Qu'empezipie o repatán,
pos l'agrada e dar ferrete!
¡ya está fecho gúen mindán,
bergoenza n'on tié perreque!
¡Y miá e no trafucá-te,
ni faltar bella miajeta,
enzenegau como estás,
atifando t'as mozetas!

REPATAN:

¡Con o permiso d'ustés
comenzipio, sí siñor,
y comenzipio por beber,
tamién os santos bebión!
¡Biénte-ne t'astí, mairal,
enchuaga-te a gargamela,
anque no me subas o jornal,
proba a mía churrumela!

(trago d'a bota)

¡Me s'esmanda a mía sesera,
en biyendo tantismo cambio
n'iste mundo que barea
más aprisa q’un eslambio!
¡S'aturrulla a mía mollera
y as ensundias me s'alteran
biyendo o pasau d'ista tierra
as pintacodas que pega!
¡Santa Orosieta nos libre
de dá-nos bel talegazo
y amanecer esmorraus
en bel tollo u marguinazo!
¡Otra bez con a mandanga,
de Bruselas han mandau,
fuera bucos y mardanos,
qu'hay que cloniar o ganau!
¡Si serán estalentaus!
¡Nunca bidon una res!
¡Pijautos entruquetaus
mandá-nos o qu'hai que fer!
To rabaño n' a mallata,
asabelo qu'alterau,
referendum irnos feito,
y asinas ha resultau:
¡Qu'astí no manda Bruselas,
ni queremos cloniazión,
pos asti mandan as güellas,
os mardanos y o pastor!

MAIRAL:

D'aquellas cabañas d'antes
cuasi y n'on queda miaja,
d'os machos y burricaus
aura Ya no se'n bei garra.
¡Nomas rabaños de coches,
pos en hai más qu'una plaga,
peden, bufan, asabelo,
y o estrapaluzio que s'arma!
¡Nomas faltan os amotos,
cuando entran asgramuziar,
u os gramidos d'os cambions
p'acabá-la d'amolar!
¡Tantisma bentosidá
a capa ozono estricalla,
y semejante estropizio
ye pior qu'una pedregada!
¡Si en l'aire to ye ponzoña,
n’on faltará e chen dañada,
ni mesaches con rangüello!
¡Semejante tufarrada!

REPATAN:

¡Qué conzieto lis ha entrau
ni en diya a ros mesaches
d'alparziar en cualquier lau,
anque sía en metá a calle!
¡Miá que ye p'asmelicá-se
bie-los cascando solachos,
agarraus enta ixe traste,
"o mobil" busan llamá-lo!
Con a zoqueta n'a orella,
pai qu'estén fatos u zorros,
brazían, calzían y esberrecan,
como os segallos modorros!
¡Cuanto más agudos yen
as mozetas y os zagals,
pos sin pasar por l'altar
ya se'n ban de luna e miel!
D'o lolo diste mozé
oi memoria yo quió fer!
Tu agüelo yera aguazil:
e tardes con a corneta,
sin más lumbre qu'o candil,
nos boziaba n'a esquineta:
¡Qu'a l'otro'l diya e conzello,
toas as casas iban d'ir,
qu'a plantar o monumento,
u aspedregar bel camín;
o capador, rogatiba,
u l'obispo que beniba!
Si yera o recaudador,
¡que mal cuerpo se poneba!
Ixa nuei bel labrador,
¡ai qué malamén dornreba!

¡Punto!

MAIRAL:

Por as tierras d'o Sarrablo
bel garbeo irnos de dar,
pa bier con cuánto traballo
o país se'n güelbe a endrezar
¡N'ACUMUER ai qu'azerrinos
tramena toz os bezinos
azicalando o lugar!
¡Ta GILLUE s'en han beniu
un rabaño d'alemans!
En IBOR as chamineras
aura güelben a fumiar,
y en AINETO ban ta escuela
cuasi un terzenal de zagals
¡Casas pinchas, zalameras,
n'ARTOSILLA han endrezau,
con güenas losas y leras
n'os zemilions d'os tellaus!
¡Asabelo qué nombraus
os AMIGOS D'O SARRABLO,
cuantismo no is zeprenau,
ai qué ilesias, qué museos,
cuánto pasau rescatau!
¡Noragüena a os de LARREDE,
por golbé-nos a acompañar
n'ista fiesta tan solene
con a cruz d'o suo lugar!
¡Que no reblen en SUSIN!
¡Y que s'achunten n'AINIELLE
allá tapar de setiembre!
¡Biba San Pelai en GABIN!
¡Biba en Biescas ESCARTIN,
chicote, pero baliente,
orgullo d'a nuestra tierra!
¡Beniros-ne ispués ta Yebra
firme y furo bailotiar,
güena borina s'apera
en as fiestas d'o lugar!

¡Punto!

CANTO:

¡ENDREZA-TE, BIELLO SARRABLO
Y EMPENTA ENTA DEBAN,
DENDE GUARA ASTA ACUMUER
DENDE URUEL ASTA CANCIAS!
TOZ CHUNTOS L'IMOS DE FER,
CHOBENS, MULLES Y AGÜELES,
CON OROSIA Y TOA ISTA TIERRA
QU'UN DIYA NOS DIBO NAZER!

MAIRAL:

Y pa poder rematar
a chanzoneta y os dichos
yo tos encargo y suplico:
¡Si algo tos ha molestau,
que lo ejéis en l'olbido!
¡Y pos yo en nombre de toz,
Orosia, lizenzia Os pido,
pa podé-li esplicar
con tu grazia y con tu ausilio
a iste auditorio que está
asabelo qu'atento y benigno,
y con conzieto d'escuchar
a tua vida, muerte y prodigios!

CANTO D'ESPEDIDA:

¡BIBA RA DEBINA OROSlA
CON SU GRANDIOSO MARTIRIO
Y BIBA ISTA ROMERIA
ALMA D'ISTE PERINEO!
ASINAS YO TOS ESPIEDO:
¡PLANTAR FUERTE Y NO REBLAR
QU'OTRA AÑADA N'ISTA FIESTA
NOS GOLBAMOS A ENCONTRAR !

MAIRAL:

¡prenzipiaré a espedí-me
por ixe Templo sagrau,
ixa fuen tan eliziosa
y por iste florido prau!
¡Adiós a Coba d'Orosia,
lugar d'o suo martirio,
adiós a ixa Ilesia que fue
d'as suas reliquias sagrario!
¡Adiós a o siñor Retor,
mui queriu Mosen Domingo,
y a o siñor Pedricador,
con clero y autoridades!
¡Pa rematar, Santa mía,
recordanza unos de fer
de toz os debotos tuos
qu'en ista zaguer añada
ta l'otro mundo se'n fuen!
¡Muitas grazias bien mereze
a Rondalla e Santiago,
qu'alegría nos ofreze
n'ista fiesta toz os años!
¡Asinas tamién quisiera
grazias dar a tanta chen
que con tan grandisma fe
participó n'ista fiesta!
¡Orosia, Santa mía!
¡Mira-te ta tanta chen,
que de tan lejos binon,
y agradeze-les a sua fe
y o gran esfuerzo que fizon!
¡Grazias por a buestra atenzión,
de toz busotros yo m'espido!
¡Dios dé-nos a Gloria Eterna
por os siglos de ros siglos!

Amigos de Serrablo