EN O VERANO

En o verano yera cuando más trebajo abeba.

En ixe tiempo se feban os trebajos más duros: dallar a yerba, carriala, segar o trigo, trillalo... Amás abeba que cudiar o ganau u as vacas, os días que tocaba y regar os gúertos. Toas as presonas teneban fama: os biellos, os mozés, os hombres y as mullers.

En o mes de junio y hasta metá de julio, o monte paizía un mar verde: os campos, as laderas, a sierra, teneban una yerba mu guallarda, si plebeba en a primavera... Dimpués s'agostaba y se bestiba d'amarillo.

O verano yera mu corto y variable. Abeba días de mucha calmaza, que picaba o sol, pero otros soplaba o cierzo y s'andaba con a chaqueta preta.

ESPANTAR AS TRONADAS

Se teneba miedo d'as tronadas, pos cuasi siempre cayeban pedregadas p'amolar os trigos. Por ixo se feban asabelas cosotas pa espantalas.

A mañana de San Juan, amás de sanjuanase antes que saliba o sol, se recojeban bellas yerbotas: yerbabuena, flor de sabuco, malvas, tolonjina, etc. Se colgaban en a falsa pa quemalas o día que beniba bella tronada.

– Ixa tronada que s'a formau en o Pueyo Cortillas, no me gusta miaja...
– Maríano, bes enta era pa bejilala...
– Felisa, Felisa, que baja por o Paco Basarán y fa mucho ruido...
– Corre, Sebastián, baja un manojé de yerbas d'a falsa, que las vamos a quemar en o fuego.

L'agüela Felisa soplaba con o fuelle pa que ardesen aprisa y salise o fumo por a chaminera, pa parar a tronada.

O día de San Pedro se cojeban rametas de buxeta, buxo u abate, pa bendezilas en a misa. Dimpués se poneban por os campos sembraus de trigo, ordio u cebada, pa que no les caese apedregada. Cuando os segadors trobaban a rameta, se poneban a rezar una miajeta.

En que os trigos prenzipiaban a golber color, se empinaba una campana, con a copa t'arriba, hasta rematar a siega. Creyeban que esconjuraba as tronadas.

S'ixas tres cosas no sutiaban efeuto y atronada beniba por os Coronazos u o Paco Basarán, drecho t'os sembraus, acudiban a tocar as campanas, pa espantala por otro lau, u se poneba bella estampa de Santa Orosia en a ventana.

L'agüelo Grabiel de Lacasa saliba enta punta d'a era, pa amenazala u espachala por as gúebras, con jiribetes, rezos u amenazas.

– Según mi acordanza, –deziba Antoné de casa Navarro–, un verano, os malos espritus camparon a sus anchas y una pedregada escachó tos os sementeros, arrastró a tierra d'os campos, rompió as losas d'os tejaus y mató asabelos animals.

A lau d'as parés se puso unos rimallos de granizo, que durón tres u cuatro días.

– L'año d'a pedregada nos ne tenébanos que haber iu d'o lugar, nos quedemos sin cosa –charraba Mauricio de casa o Royo
– Pero, ¿t'ande ibanos a ir?, difuera no ataban os perros con longaniza, en ixos años, –añadiba Francisco de casa Lacasa, asina que tubenos que tirar p'adelante...

ENTA SANTA OROSIA

Antes de prenzipiar a segar a yerba, beniba o día de Santa Orosia Dinantes os cbebans se poneban d'acuerdo pa ir y encargase d'a bandera. L'alcalde deziba quien teneba que llevar a Cruz, a redolín.

A brispa, as dueñas preparaban gítena brienda. Os hombres miraban os aparejos, con a manta colorada y abandiaban as campanas.

O día 25, a punto día, s'ajuntaban tos en a puerta a ilesia, mientras abandiaban as campanas, y saliban en procesión con a Cruz y a bandera, hasta a Cruzeta. Asti los despediban, y seguiban por o camino os gúertos, o Paco de Basarán, San Blas, a Cruz de Cortillas y Sancocobá.

A lau d'a ermita, tos os de Sobrepuerto feban a procesión hasta o Zoque, pa esperar a os de Yebra, que soliban con o crapazín d'a Santa. S'escansaban una miaja p'almorzar tos juntos. Dimpués se formaba a procesión on toas as chens qu'iban acudiu enta romería. Delante, as banderas de tos os lugars, con os mozos que no paraan de bandialas. Se feba o besacruces: toas as Cruces besaban a de Yebra y se poneban en marcha, seguíus d'a peana con a Santa y os danzantes de Yebra, hasta a ermita, ande se izía una misa cantada. A continazión daban a adorar o crapazín d'a Santa.

Ascape acudiban tos a comesen a brienda, alredor d'a mata de buxo que cada lugar teneba dende siempre.

En a romería de santa Orosia se feba de to: dende rezale a santa, fer bel ajuste de novios y afirmar bel criau.

Asina, os amos de Camarrón d'Escartín s'en fuen a comer con os de Charmas de Basarán, enta misma mata, pa charrar d'a boda, d'os mozos:
– Ixos s'iban de casar pa setiembre, antes d'a siembra, –izía Lorenzo.
– Pos si, porque o mozo nuestro tien mucha fama. Amás d'aduyar a sembrar, igual s'en tien que baxar enta Tierra Baxa, si no trobamos pastor, –respondeba Maríano.

A metá tarde, os danzantes de Yebra se poneban a bailar en o tascal y feban brindis de picaillo, que os mozos u as mozas l'en daban a o mayoral. En bella ocasión se sintió ixe:
– Si no por a sericueta, o requesón y opreto n'on habría chen viva en to ro Sobrepuerto.
– A pesar d'Os de Yebra y to ro valle Basa anque bienga un año malo, aún yai trigo en casa y ejaremos pasiar a Pedro por to ro valle Basa, – se les regolbió un tión de casa Allué de Basarán.

Dimpués cojeban o camino de güelta, parando a brendar u a ichar trago en a metá. Cuasi de noches llegaban enta Cruzeta, ande les esperaban tos os que o iban iu. Feban a procesión hasta a ilesia, baxo o son d'as campanas.

Beniban tos eslomaus: cuatro horas guallardas pa ir y otras tantas pa golber, amás d'estar to'l día arratrus por o puerto. Ufleno, y si les cayeba bella tronada, no igamos...

FER A COLADA

– Mañana que nos baga ibanos de fer a colada, antes de prenzipiar con a yerba, –paroliaba Felisa mientras feba a cena.
– Mia si a terminau Heginia d'o Royo, que me paize que la feba ayer, –respondió l'agüelo.

Anque a plaza d'a fuente yera gran, preferiban lavar a solas, pa no biyer as ropas d'otri.

Güena mañana llevaban o roscadero, a coladera, una pozaleta de zenisa, a bazía de lavar, a tableta pa golpiar a ropa y güen faxo de ramas pa calentar l'agua en bel caldero. Feban o fuego en metá de dos peñas, pa poner o caldero denzima y a banca d'a colada a lau.

– María, como t'as de casar, tenebas que aprender a fer a colada, pa cuando te toque, pos siempre no tendrás a l'agüela u a madre pa enseñate...
– Ah, güeno, pos ya iré.
– Primero bes poniendo a ropa blanca, de lana u de caimo, con una capa de zenisa. Dimpués vas ichando l'agua caliente por arriba, poqué a poqué, pa que a zenísa blanqule bien a ropa...
– L'agua que sale por a banca gúelba ent'o caldero.
– Pos asma estaremos to'l día, agüela. ¿Qué te pa a tú, que se fa sola u qué?

A lau, Felisa iba enjabonando otras ropas en a bazía, pa metelas en a colada zaguera.

Dimpués cojeban a ropa y l'aclaraban bien en os lavaderos, pa tendela en un fenalón, a lau de casa.

DALLAR A YERBA.

Unos días antes se remenaban os aperos pa dallar: as dallas, os rasquils, as forcas, as cubiertas pa carriar, pa tenelo to a punto.

A yerba se criaba en os fenals, en as marguins y en os marguinazos d'os campos sembraus de trigo, cebada u ordio. En Matil abeba unos fenales mu grans, ande se feba una yerba mu guallarda. Tamién en a pardina d'a Isuala en abeba mucha.

Se penzipiaba a dallala pa San Juan y se remataba cuasi pa Santiago. AmAs se sembraban bellos campotes de pimpirigallo, tefla y alfalz. Abeba que replegar toa que se podeba, pa dale de comer a o ganau y as vacas en o invierno.

A punto día marchaban os dalladors, dimpués d'abese tomau bella copeta d'anís, con a dalia y as forgas en o gúembro, pues izían que con a mojadura se dallaba mejor.

Allá las ocho y media u las nueve, acudiban os zagais y bella muller con o almuerzo: potaje de patatas con sopas y bella miajeta de carne, a bota de vino y o botejo u bel tonelé con agua fresca.

– "Mientras nusotros almorzamos, busotros, mozés, desanchar a yeta, pa que se seque aprisa, asma, mañana, ya en podremos catar un viaje, –iziban os segadors."

Con o que iban dallan hasta almorzar, abeba que trebajar güenos ratos, pa desanchar as trenas de yerba, con as forcas. Si picaba o sol, se secaba en día y medio, dimpués de contornala un par de veces.

A media mañana, beniba otro zagal con o lasdiez: un platé de cebolla y tomate, bel cacho de queso u longaniza con pan, un par de tragos de vino y alguno d'agua.

A ormino afilaban a dalia con a piedra que se portaba en o copolón, pa que cortase mejor, pues s'adiermaba con os tarrancos, bella topera y as piedras que abeba en o suelo. Cada hora u asma, paraban a picala con as forgas, sentaus en a punta de bella foñada u en metá d'o fenal.

En Matils abeba un fenal mu gran, de casa Borderas, que, cuando s'en fuen enta Zaragoza, les ne arrendón a os de Buisán, Lacasa y Ferrer. Estaba rodiau de paré y aún se pué biyerr en o pie d'a Sierra.

O día acordan, acudiban dos dalladors de cada casa y les costaba cuasi dos días. Feba goyo hielos dallar, uno detrás d'otro, en ringlera, dende o cobajo hasta o cobalto, con as trenas de yerba... Siempre en abeba alguno afilando u picando a dalia. Dimpués acudiban otros con a brienda pa desanchala y contomala. Se repartiba p'as tres casas y se carriaba ent'o lugar: un par de viajes por día.

– ¿As perdiu o caldo por o camino u qué, mozé?, –izía José de Ferrer, que se biyeba negro pa tragar o potaje de jodías.
– Una miajeta se m'en a caiu, porque en o esbarro a Sierra se m'a espantau o burro y m'a tirau ent'o suelo, – respondió o colorau o pobre Antoné.

Ta ixos campos de lejos, se llevaba a brienda a caballo en bel abrío y abeba que tener mu güen pulso pa no tirar o caldo por o camino...

En a pardina d'a Isuala tos teneban campos y fenals. Costaba bella semana de replegar ayerba asti. Os que teneban buerda la poneban en o piso d'arriba, pa carriala en o invierno enta casa.

Primero a yerba, dimpués os trigos, os dalladors no remataban en dos meses, a ormino endoloraus d'os riñons y cojeban güenos quebrantos.

En que estaba seca a yerba, se recojeba con as forcas y os rasquils, carriándola de dos maneras. D'os fenals d'a lau d'os yerberos, se carriaba a trusas: se feba un güen fardo de yerba en una cubierta cuadrada, ateclada con dos brecas. Se cargaba en os güembros con adoya d'otri u arrimándola enta bella pare.

De contino, se carriaba a cargas con os machos. Se extendeba a cubierta y se meteba un güen montón de yerba, ateclada con cuatro brecas. Aún s'apretaba y s'en poneba más por arriba, dimpués d'embrecala. Entre dos presonas se cargaban en os machos, denzima d'o aparejo y s'apretaban con dos sogas.

– Mia que se tuerce a carga, Martin, y dimpués no la podrás endrezar, –le izía José de Lacasa, qu'iba detrás por o camino.

Abeba que parar o macho, aflojar una miajeta a soga y dale un empentón a carga pa endrezala. Si estaba cuasi caida, abeba que golber a cargalo. Con tantas güeltas y regüeltas, sobidas y bajadas por ixos caminos, se podeban torcer as cargas.

– A la una, a las dos, a las tres, arriba. – se izía pa cargar.

Si se feba mucho empentón, s'espachaba a carga ta'l otro lau d'o macho, ent'o suelo.

En o yerbero se patiaba bien a yerba pa que en cabese más, hasta os maderos. Os zagals aduyaban a forquiala con as mullers, mientras os hombres la carriaban.

– Bienga, patiala bien, mozés, que si no con cuatro cargas se llenará o yerbero, –
pataniaba Maríano, mientras se daban bel tozolón en os maderos.

MASAR.

– Ridiez, María, ya podebas haber icho que no abeba máspan en a bodega... Ya pues ir a amprane una pieza ta casa Sampietro, que ya les ne golberemos cuando risasemos. As dueñas gosaban bejilar o pan, pa antes de rematalo, pero tarnién teneban masar escuidos...

En que llegó Felisa d'o campo, le falto tiempo a l'agüela pa izile:
– Pa escansate, mañana a masar, que s'acabau o pan...
– Pos, con a fama que yai..., ¡teneba qu'ir a contornar a yerba enta Basa! Ixo rai, a yerba pue esperar otro día. María, bes a uscar a levadura pa metela a remojo.
– Mia que ya tiens farina zernida en o torno, –izía l'agüela.

Se mezclaba a farina con a levadura y agua, e a bazía de masar, regolbiéndola bien con os brazos. Dimpués se recojeba a masa enta un canto, tapada con un masero de caimo, pa ejala reposar.

Mientras, se quemaba a leña de pino en o forno. A continuazión se partiba a masa en trozos, pa metelos en o forno, con a pala d'enfornar:
– ¿Qué mal as pasau o escopallo?, están toas as brasas en a metá. Ya lo pues pasar otra vez...

Se feban deziocho u bente panes, que se guardaban denzima d'una tabla larga, que se colgaba en a bodega, tapaus con un masero decaimo.