Amigos de Serrablo

A SIEGA

Os días zagueros d'a yerba, abeba que correr si s'alantaban os ordios y os trigos.
- Ibanos d'ir ent'o campo Sarrato, pa biyer si está segadero, mu amarillo se bei, -charraba Mariano en a puerta de casa.
As dallas no s'ejaban enfriar: d'a yerba ent'o trigo, to seguíu. Y os dalladors, ¡otro mes sin podesen tener d'os riñons!. . .
Se prenzipiaba a segar alredor de Santiago y se remataba a primeros d'agosto. A dalla se le poneba un rastillo pa que caese o trigo en nais.
Pa segar abeba que mobelizar tos os brazos de casa: un dallador, otro pa engabillar, o atador, otro pa dale as gavillas y otro más pa cristiar y respigar.
- Si o dallador yera mu güeno u te lo ejaras alantar, no podebas dar abasto a engavillar y atar, -charraba Pepito de Buisán.
O dallador prenzipiaba por a punta d'una faxa, ejando o trigo a trenas u nais. Detrás, o engavillador feba as gavillas, con un rasquil que teneba os dientes una miaja más claros que os de yerba.
O atador s' encargaba de poner a remojo os benzejos -de palla de centeno u d'esparto-: feba os faxos con diez u doce gavillas, que l' en daba un mozé u bella muller, que teneban que ponese unos manguitos, pues a garba seca ybel gardancho punchaban os brazos y as manos.
O zaquero pasaba un rasquil gran, con os dientes de fiero -o cristo-, aduyau por bella sogueta pasada por o güembro, pa retabillar toas as espigas por o campo. A garba que recojeba s'izía cristiaizo y se poneba tamién en os faxos. O cristiador teneba que respigar as espigas que quedaban por as faxas.

Si a cuadrilla de segadors yera completa s'alantab m'as. En a siega se feban as comidas fuertes y a ormino, namas se paraba a ichar bel trago y a mediodía.

-Busotros tos pensaz que m'estoy mano sobre mano. Pos no tiengo que escurrir pa fer as comidas, dales de comer as gallinas, os conejos, os cochíns y carriar bel ruscadero de yerba, pa que coman os abríos de noches..., -pataniaba l' agüela Orosia que se cudiaba d'a casa, como as demás agüelas d' o lugar.
-To se lo ize usté, -le respondeba a choben, Felisa.
-Como paize que namas yai rebajo en o campo.. .

As tronadas yera o pior que podeba pasar: si apedragaba s'amolaban os trigos y si plebeba se mojaba a garba, y dimpués abeba que bultiar os faxos pa que se secasen, asina no se podeban trillar.
Namas rematar de segar, se prenzipiaban a carriar os faxos enta era. Cada macho cargaba tres faxos: uno ta cada lau, dentro de una cubierta, y otro denzima. Os faxos s'afajinaban en os abanzes d'as buerdas d'as eras, en os bordones y en bel pallar que abese quedau más tarde.

A TRILLA

Cada casa teneba su era pa trillar, difuera d'o lugar, en un cerro ande pegaba bien o cierzo. En 15 días yeran un forniguero de chens y d'abríos, de gritos y d'arreos.
O primero que se feba pa preparar as eras, yera segar a yerba, dimpués se pasaba o ruello, bien de mañanas, con a mojadura. Asina se poneba una capa dura, pa podese escobar o trigo dimpués de trillar.
L'amo se bantaba a punto día pa rollar a era. Dimpués sacaba un trezenal de faxos, pa tender a pallada. S' escansaba una miajeta pa ichar un trago y, en que calentaba o sol, prenzipiaba a trillar.
De primeras con o trillo de pedreñas, daba güeltas y güeltas, pa machacar bien a palla. Se feba a primera contornadura y otra vez a trillar. En que a palla estaba bien caliente y cruxidera, s' enganchaba o trillo de ruedas.
Otra contornadura y s' ejaba escansar una miajeta os machos, mientras se les ichaba un prienso en a pesebrera. Os hombres se comeban o las diez pa ichar trago: a bota, o porrón y o botejo d'agua fresca no faltaban en a guambra d'a era.

-Amos, que ya va güeno, Mariano deziba Luis de Perrer, que pasaba a abrevar os machos enta fuente.
-Aún está una miajeta correosa, a ver si calienta más o soL..
-Me paize que están toas igual, con ixe nublau an recio...

Trillaban un rato cada uno, pa no cansase de dar güeltas: l'amo bel mozo y os mozés. Se cantornaba dos u tres veces más, sin parar de trillar. Costaba cuatro u cinco horas, según como estase a garba de seca.
Se recojeba a pallada con a recojedera u retabillo enta un montón, aduyaus por bel abrío y detrás, con as escobas de triamol, se recojeba o grano. Mientras, os machos se meteban en a pesebrerá pa dales de comer bel rato.
En que mobeba o cierzo, se prenzipiaba a aventar con as forcas, metiendo una palanca de siñal entre o grano y a palla. Se remataba de limpiar o grano con a pala de madera.
Si tardaba en mover o cierzo, os días de mucha clama, izía 1'amo:
- Aún tendremos qu' entrar o montón ent'o bordón..., y mañana, doble faina.
Y si estaban aventando y pasaba bel vecino izía:

-Hala que va güeno l'aire, Mariano.
-No va mal.

Dimpués as mullers s' encargaban de porgar o grano, con aral y porgaderos y os hombres meteban a palla en a buerda, forquiando con as forcas, u en bel pallar, carriándola a trusas, en os güembros.
O mozo se cojeba os machos y carriaba dos u tres viajes pal otro día. Os demás remataban d'entrar a palla y carriar o grano, en talegas, ent'os truexos.

- Justo beniba: en que se remataba de to, se feba de noches, -deziba ManolO' de BIas.

Toas as comidas se feban en a canto d'a era, sin parar de trillar. Ixas días abeba mucho bulliciO' en o lugar: par tas as laus se sentiba arriar as abrías pa trillar.
Si se farmaba bella tronada, abeba que replegar a pallada ent'o bordón u ent'a abanze, pos si se majaba, yera mu mal de trillar dimpués. Un treballo mu mala yera farquiar a palla en os pallars, pas se feba mucho polvo'. Os zagals patiaban a palla pa que en cabese más.

USCAR UN MONTE EN TIERRA BAXA

-Antonio, ibanos d'apalabrar o monte pa esti año, aura qu'imos rematau a siega, -izía Mariano Camarrón.
-En ixo estamos. Si tos paize, podeban entendese as agüelos, que tien conozenzia d'atros años, -respandeba.
-Si pué ser, repetimos enta Osera y p'as paridas que usquen bel montacho astí u en Pina.

Miguel de Camarrón y Antonio de Sampietro iban vatiau tas os montes d'a ribera l'Ebro, dende Osera hasta Escatrón, primero de zagals, dimpués de repatans y aura pa uscar monte. Asina que pa escansase d' a siega, a pasar güena chicharra por Tierra Baxa, a metá d'agosto.

-Antonio, ¿cuándo quies que marchemos?
-Pos, si te paize, pasau mañana mesmo.

Asina que se cojió o pañuelo fardero con bella miajeta de brienda y, a punto día, marchón por Ainielle, Berbusa, Lárrede y Aurín, pa coger o tren en Samianigo enta Zaragoza. A los dos u tres días golbión por o mesmo camino y con o monte apalabrau:

-Imos cojiu o mesmo d'otros años, pero os lorros s'ichan largos pa pedir, -izía Miguel de Camarrón.
-Con o caros que se ponen os montes y os pastors que s'en van ent'as fabricas, no sé que faremos, -anadiba Antonio.
-Pos que tendremos que bendenos o ganau y ejar pa vida namas as que podamos mantener en o invierno...
Y Asina fue como os rabaños empezón a menguar en os lugars d'a redolada, se fizon os yerberos más grans, pa meter más yerba y pasar os meses d'invierno en as cuadras, si cayeba bella nebadota.

CUDIAR O GANAU

Mientras as chens feban toas ixas cosas, os dos rabaños de ganau estaban cudiaus por dos pastors afirmaus, que se trayeban unas güellas d'ellos, amás rezebían unas perras y a brienda les ne poneba a casa que le tocaba o ganau. Toas asnoches le llevaban a cena enta mallata y, de mañanas, o almuerzo con a brienda pa tol día. Tamién le lavaban a ropa y l' ejaban as mantas.
Cada quince u bente días abeba que dales sal. Pa ixo, se moleba a sal, estregando una peña redondiada con otra plana u labadera, pues fina la comían mejor y en malmetían menos. Izía o pastor:
- Pasau mañana, que yemengua, ibanos de dar sal, que ya fa mucho que no en an comiu y tienen fambre...
Ixa mañana sobiba uno de cada casa, con a sal en talegos, a lomos de bel burro, ent'as salineras d' o Pueyo. O pastor soltaba una miaja más tarde, pa que se calentasen as güella, que paize que barruntaban a sal, porque no se podeban aturar. Ya en as salineras, s'amontonaban alredor d' as piedras:
- Cuasi no les ne podebas ichar más, u te tiraban ent'o suelo, -izía Mariano.
Muchas güellas s' afanaban de comer sal, dimpués bebeban demasiau y les cayeba mal. Repetiba o pastor:
- No les n'icheis más, que se rincharán con l' agua, ye mejor dalesne más a ormino.

O día que tocaban as vacas abeba que dase güelta pa cosiralas: mirar si en abeba alguna enferma u bel becerro estorbau. Tamién bejillar que no s'en bajasen ent'os sembraus d'a Isuala u de Gasarto.
- Ya pues correr, Salvador, qu'enfilan os guas enta Isuala: as primeras ya llegan ent' o Cuello, -deziba Orosia.
Y abeba que salir al galope p'aturalas con os perros y a gritos. A ormino se meteban en os trigos y, si feban mucho mal, se le golbeba a l' amo o grano que les paizía. Pa San Ramón, 30 de agosto, o ganau correba toa Sierra, un rebaño por ca lau. Os guas se baxaban enta Isuala y a Corona, ande estaban cuasi hasta el Pilar.

OTROS TREBAJOS

O día que tocaba o riego en os güertos, se miraban os tomates, as bainetas y bella calabaza. Se sobiban en bella cesta.
Bel día que amenezeba nublau, no s'atrebeban a tender a palIada, s'iba a mantornar bella güebra, pa enronar o fiemo, u se sembraba bella faxeta de nabos.
En que se remataba de trillar se recojeban as lentejas: si yeran guallardas, se dallaban y, si no, se segaban con a falz. Se carriaban enta era pa ponelas a secar y dimpués se mallaban con una forca, pa esgranalas. O mismo se feba con as gUlxas.
En que se remataba de trillar, se prenzipiaba a preparar os campos pa sembrar: pa'l Pilar ya teneba que estar o trigo en a tierra.
O ganau ichaba toas as piedras ent' as faxas. Os capiteros paizían un espedregal u margüeño, con as patas las espachaban enta baxo. Izía Miguel:
Mañana ibanos d'ir a espedregar enta Cuasta. En os capiteros feremos paretons pa ichalas denzima, si no se cairán solas y tos os años a mesma faina.

OS ARRIEROS

-A llegau o QUINCALLERO Félix de Labuerda, cargau de cacharros. Que bengaz por casa pa biyelo, -gritaba dende a branquilera d' a puerta Amalia de BIas. .
-Entre prisas y cuento, i con a faina que tenemos!, pero, amos, dimpués iré si me baga, -respondeba Felisa.

Antes u dimpués, toas as mullers acudiban pa reponer bel pucheré, bella' charreta, bella olleta u bel cazuelo, pagaus con lana u bel queso.

O día menos pensau, gosaba acudir un TENDERO, que beniba dende Barcelona cargau de telotas. Tamién paraba en una casa y avisaba a os demás. As dueñas compraban bella tela pa cuando benise o sastre, si no sabeban coselo ellas.

AS BISPRAS D' A FIESTA

Os mozos d' o gasto sacaban bel rato pa reunisen en a fuente, pa charrar d' a fiesta, que se feba o tercer domingo de setiembre.
-¿Qué mosicos trairemos estiaño?
-Pos, cualos vas a trayer, os de siempre: Sebastián de Naval, con o briolín y Lucas de Fiscal, con a guitarra.
-Por bella miajeta más, podébanos uscar una cordión tamién...
-Y, ¿andela trobarás?
-Quio, en Janovas en yai uno que igual sobiría. . .
-¿Qué rifaremos?
-Pa bariar, podebanos rifar be! tarnasco, porque tos os años con os pollos...

Tamien s'ajuntaban pa ir enta fiesta d'os l1.lgars d'a redolada. Anque no se tenesen parientes, no faltaba ande comer y fer noche. Dimpués se golbían as tornas con a Fiesta d' o lugar.

. A FIESTA

A fiesta gran se feba o tercer domingo de setiembre y acudiban os parientes y os mozos y mozas d'os iugars d'a redolada, anque no tenesen familia. Alomeior s' ajuntaban doce u quince presonas en cada casa.
Os días d'antes, a dueña feba os preparativos de comida y de ropas y l' amo mataba bella güella, sacaba o vino rancio d'a cuba, etc. Se masaba y se feban unas tortas mu güenas, pa sacalas enta ronda y p' os enbitaus.
A bispra se bandiaban as campanas, que se sentiban dende mu lejos y llegaban os primeros embitaus y os mosicos. Dimpués de cenar, os mozos saliban a rondar con os mosicos, alumbraus con as lampas de carburo, tocando pasacalles y cantando jotas por as casas. Os mosicos dormiban toa fiesta en a casa que correspondeba a redolín y que abese mozos. As comidas las feban en toas as casas.
O primer día, a metá mañana, iban llegando os güespedes. A mediodía se bandiaban as campanas y se feba misa mayor, antes cantadas por os agüelos. En a lonja ya plazeta d'a ilesia se saludaban tos os embitaus, charrando un güen rato. As dueñas correban enta casa pa remaar a comida, os hombres seguiban charrando y os mozos prenzipiaban a ronda:
- Hala, Sebastián, templa o briolín que ya sale o mosen y se fará tarde pa comer. ..

A ronda prenzipiaba siempre con una jotica

pa mosen, en a puerta a ilesia:
A mosén Ramón saludamos
Antes de prenzipiar a rondar,
Tos os mozos le pedimos
Que rece y bendiga o lugar.

Dende astí seguiban casa por casa, parando delante a puerta u en o corral. Cantaban una jotica de saludo a bella moza, a dueña u a l' amo, otra pa despedisen:

-Bienga, Beturián, canta una jotica.. .
-Tiengo a voz estropiada.
- Ichate un trago de vino rancio. ..
- No, traime un güego d'o gallinero, que esté recien puesto. . .

Creyeban que os güegos crudos aclaraban a voz. As mozas s' asomaban por as ventanas y os balcons y os mozos feban calculas pa uscasen bailadera. A dueña u l' amo sacaba un par de bandejas con torta güena y o porrón de vino rancio.

Fer correr o porrón, que se me atraganta a torta, -izía Ramón de Pedro Bergua.
En que remataba a ronda, os mozos d'o lugar se repartiban os mozos forasteros que isen beniu: '

-Tu, Pedro Bergua, t'en biens a comer con nusotros.
-No, para, que l'i dau palabra a Blas. Ya iré a cenar. . .
-Ah, güeno, no te vayas a quedar sin comer...

As dueñas feban comida especial, con o mejor que podeban: güenos entremeses, carne asada u guisada y güenas natillas de proste, acompañau de güen vino encubau.
Dos u tres mozos pasaban por as casas pa vender numeras d'a rifa que feban o tercer día, asina s' aduyaban pa pagar os mosicos.
A metá tarde feban una ronda pa embitar as mozas ent'o baile, que se feba en una era. Dimpués de cenar feban otra sesión. En o baile d'o tercer día subastaban os ultimas numero s y sortiaban os pollos u o tarnasco.

O tercer día s'en iban cuasi tos os güespedes, namas quedaban pal otro día os más allegaus. .
Dimpués de tres u cuatro días de fiesta, os mozos y as mozas remataban acotolaus, sin ganas de golber a trebajar. Charraban d'as charadas que abeban fecho, d'as bailaderas qu'iban teniu, d'os mozos forasteros. As agüe las se poneban de malas y les espetaban:
- Mia si tos lebantaz, mia si mobez... No sé cómo aguntaz tantas horas larguizos. ¡Qué poco Bizéntico de Buisán!, y'a marchau güena mañana a espedregar. . .
Y os días d'a fiesta prenzipiaba a sanmigalada.