V. CHARRADAS

O LOBO DO CAMINO NIABLAS

En o camino de Escartín ta Ainielle, al otro lau da glera, yay una pardina que l'izen Niablas. Fa muchos años que no gosa vivir nenguno, a ultima familia murió, al paizer, de peste. Os que quedón vivos s'en fuen enta Oto, por ixo recibió casi toas as tierras de pasto. Os de Escartín se fizon cargo de bellos campos que teneban y dimpués les ne dejón to a os de Oto. En ixos campos se feban mu güenas as patatas y tamién o trigo yera mu guallardo.

Dende Escartín o camino iba por o Campo Escolano, as Sarripas, os Viñals, as Planas, por o Caxicar, por o pinar do Bezuelo y se cruzaba a glera por un pontarrón u por as pasaderas.

Antes por ixos lugars abeba muchos lobos que se comeban as güellas y espantaban as presonas. S'iban en manada aún yeran piores. Cuando les apretaba a fambre beniban de noches por alredor do lugar...

Una vez fue Grabiel de Unsens a sacar patatas ta Nieblas con un macho. S'en picó media ozena de talegas en tol dia y, cuando s'en iba o sol, s'en fue ta casa. En que pasó o puente da glera se le fizo de noche y por o pinar do Bezuelo prenzipión a autilar os lobos que feban temblar a escolaneta.

Antonzes Grabiel se puso delante do macho, tirando do ramal pa felo ir más aprisa. Dimpués de pasar o barranco do güerto Niablas, o macho prenzipió a dar resoplidos y a andar aprisa como si le pisasen os talones.

-Sooo, sooo..., iziba Grabiel. Pero o macho resoplaba más, levantaba asabelo as orejas y quereba correr, Miró ent'atrás y bido un bulto negro que seguiba detrás do macho, l'iba tocando os garrones. Por as Planas o camino ye más ancho y o lobo quereba pasar t'alante, pero o macho no lo jaba.

-Sooo, sooo..., aún me tirará a carga, pensaba Grabiel por sus sintros. Mientras bienga detrás no me ferá cosa y como m'ataque le daré un estacazo güeno en os morros.

Tanto o macho como o arriero iban mu aprisa, apretanto que puen. Dende as Sarripas emprezipia a subida enta o lugar, nenguno dos tres quié quedase. Amas no paran de cantar os craberos por o paco Basarán y por o barranco dos güertos, pa fer aún más miedo....

-Ya me queda poco pa llegar ent'o lugar. Este ye capaz d'acompañame hasta casa. Pues como coja a escopeta...

Pasó por debajo da era Camarrón, por a de Pedro Escartín y antes de llegar ta casa prenzipió a gritar con as pocas fuerzas que teneba:

-Rebesindaaa, Rebesindaaa... Eh, eh, eh. Abrime a puerta, corre, abrime a puerta, que me coge o lobo...

A mujer brincó do fogar pa abrile a puerta do corral, pa que entrase corriendo Grabiel con o macho. Entre os dos zerrón ascape con a tranca.

-¿Qué ta pasau, que biens tan sofocau...?

Grabiel no teneba fuerzas ni pa contestale, ni pa escargar o macho. Os de Camarrón, Unsens y os de Sampietro que sintión os gritos, se asomón por as ventanas, alumbraus con as tiedas pa ver o que pasaba:

-¿Qué l'abrá pasau a Grabiel que gritaba tanto...?

Denseguida salió por a ventana con a escopeta, pa pegale un tiro a o lobo si estaba en a calle. Cuando lo bidon tos le preguntón:

-¿Qué ta pasau Grabiel, que t'imos sentiu dinantes?

-Cosa, que m'a seguiu un lobo dende Niablas, m'a techo espantar o macho y m'a fecho coger un güen crebanto.

-Pues, amos en t'as Lañas pa matalo, que sabrá parau por alli.. Y tos salión con as escopetas y tiedas por alredor do lugar, pero, o lobo no lo bidon

Grabiel se puso alau do fogar pa secase o sudor y les contó o que l’iba pasau.