V. CHARRADAS.

TOCAR AS CAMPANAS.

As campanas de cualquier lugar de Sobrepuerto se sentiban dende os otros, feban mucha compañía y siñalaban que os lugars no estaban amortaus. Se tocaban muchas veces al año y por muchos motivos: pa rezar e ir ente misa, pas fiestas, pos entierros, pa apagar bel incendio, pa espantar as tronadas...

En que cabezaban os trigos y hasta que s'iban trillau, casi to verano, se empinaba boca arriba a campana prenzipal, porque se creyeba que feba ir por otro sitio as pedregadas.

As tronadas más malas beniban de par de San Cocobá, por a Estiva y o Pueyo Cortillas, casi siempre apedregaba. Antonzes os hombres que abeba en o lugar, acudiban a bandiar es campanas sin parar pa esbiar e tronada.

M'alcuerdo que un año estábanos toas as peonadas en a añada de Lacuna. A mediodía llegó una tronada y namás s'alcontraba en o lugar mi agüelo que estaba ciego. Al barruntar a tronada subió tantiando con o bastón enta torre y se puso a bandiar as campanas. Nusotros nos pusemos en a caseta, enfrente do lugar y biemos cayer un rayo en a torre, deseguida se parón as campanas... Pensemos que habría matau a o que tocaba, no sabebanos quien yera dende o campo.

Mi padre s'en fue corriendo enta o lugar con otros vecinos, subión enta torre y encontrón en o suelo o agüelo desganau. Lo bajón enta casa ascape y poco a poco prenzipió a golber. A chispa le bajó por o lau drecho y, dende a rodilla hasta o pie, le sucarró a calzilla. Cuando golbió en sí nos iziba que fue como si l'abesen dau un latigazo mu fuerte en ize lau. Dimpués nadie quereba subir a tocalas por miedo y namás ponébanos una campana empinada to verano.

Cuando yo yera chicote tamién m'alcuerdo que mi tío Grabiel de Lacase subiba enta era, si beniba una tronada con mucho roido, se poneba en a punta da paré, ande feba unos rezos, unas cruces y jiribetes con as manos, pa exconjurala.

Tamién cuando se prendeba fuego bella casa u pajar se tocaban es campanas mu aprisa, pa que acudise a chen con pozaletas d'agua. Una vez cayó un rayo en o pajar da era Buisán, denseguida tocón as campanas y acudió to lugar pa aduyar a apagar o fuego. No adubiban a bajar agua da fuente. Al sentir es campanas y biyer o fuego, binon muchos dende Basarán, a hora y media de camino. Otro año, os de Escartín tubon ocasión de golber as tornas, al quemase casa Casaus de Basarán.

Antiguamente tamién se tocaban pa llamar a conzello: o alcalde mandaba tocar a o aguazil y acudiba uno de cada casa ent'as escaleretas da plaza.